AF268: 4v

ʿİlm‑i şerīfe düşendür ki maḥmīye‑i Budūn neferātına ʿulūfe tevzīʿ ėtmek // kemāl mertebede emr‑i ʿaẓīmdür. Zīrā nuqūd‑i muḥtelife ve bir birine muḥālif narḫlardur. // Mes̱elā penz ve filler ve patuşqa ve babqa ve marçel ve ġuruş ve ġuruşuñ // envāʿı ve ʿos̱mānī ve ḥasene bu cümle tevzīʿ‑i mevācibde bir birine muḫteliṭ olur. // Bunca esbāb [u] eşkālden ġayrı bir niçe ṭavāʾifdür ki yevmīyeleri bir birine // muġāyir olduġından ġayrı bu tāʾifeʾi iki fırqa ėdüb // birine altı ayı yüz y[...] yetmiş bir gün ḥisābınca vėrirler ve birine // yüz yetmiş yedi gün ḥisābı üzerine vėrirler. Ve fetḥ‑i ḫāqānīde // bir nice müddete degin āsitāneden mevācibe sikke‑i filuri gelürdi ve neferāt‑i // reʿāyā‑yi diyār‑i Üngürūs almaduqları eclden her nefere niyāz ile altı aylıq // ʿulūfesine üçyüz ʿos̱mānī vėrilür cümle ʿulūfesinden üçyüzi // tefrīq ėdüb bāqī aqçeʾi altmış beşer aqçe üzerine filuriye // taqsīm ėdüb ḥasene ne qadar ise ḥaseneʾi çeküb raqmını qorsun. // Quṣūr qalursa ẕikr olınan üç yüze żamm ėdersin naqdīye dėyüb // raqmını qorsun. İşbu ṣūretde mes̱elā: //

Lākin nefere vėrmek lāzım geldügin penze tebdīl ėdersin. Ammā tā evvelden ki // yevmīyeʾi [yüz] yetmiş yedi güne ve yāḫᵛud [yüz] yetmiş bir güne ḥızb ėdüb // ḥāṣıl‑i ḥızbı maʿlūm ėdesin. Ḫazīne‑i ʿalīyeye alınacaq aqçede ol // ʿaddi ʿos̱mānī iʿtibār ėdüb ḫārice vėrür olıcaq penz ḥisābınca vėresin. // Bu bābdan fāʾide‑i küllīye olur. Ve rüsūm‑i berivātda her bir ay // tamām otuz gün ve ʿos̱mānī ḥisāb‑ile alınur. Daḫı niçe diqqat vardur // ki icmāl ü tafṣīl olınur inşāʾa llāhu taʿālā.